O Instituto de Estudos Miñoranos en colaboración coa Concellería de Cultura de Gondomar organiza un concerto de Xardín Desordenado dentro do periplo que este grupo está levando a cabo para promocionar a súa última gravación.
Na roda de prensa de presentación do concerto estiveron presentes Santiago Ferragud (guitarra voz e compositor), o director da Sección de Lingua e Literatura do IEM, Miguel Anxo Mouriño e o concelleiro de Cultura de Gondomar, Ignacio Troncoso.
Santiago Ferragud indicou que: "o disco pretende render unha homenaxe á poesía galega. Nel recóllense dezaseis poemas musicados, que, pola variedade xeracional e estilística, poden constituír unha mostraxe significativa dos poetas contemporáneos".
Pola súa banda o concelleiro de Cultura de Gondomar, Ignacio Troncoso salientou que "a importancia das obras seleccionadas e a calidade dos músicos confírenlle a este concerto os ingredientes necesarios para asegurar o seu éxito, como confirma a boa acollida que está tendo noutros lugares de Galicia". Destacou ademais, "a dimensión didáctica que o converten nun medio eficaz para iniciarse, particularmente mozos e mozas, no gusto pola poesía".
concerto terá lugar o próximo venres 23 de marzo, ás 20:30h. no Auditorio "Lois Tobío" de Gondomar e a súa entrada é libre ata o límite de aforo.