O Instituto de Estudos Miñoranos hónrase en presentar o día 17 de maio ás 19:00 horas, no Auditorio Lois Tobío de Gondomar, un espectáculo de base teatral co que pretendemos renderlle unha merecida homenaxe a Roberto Vidal Bolaño a quen se lle dedica este ano o Día das Letras Galegas. Dada a consideración universal do noso persoeiro como peza fundamental (e, mesmo, fundacional) da dramaturxia galega quixemos que este acto estivese integrado na súa totalidade por persoas vinculadas ao mundo  do teatro e por iso os diversos grupos que operan no Val Miñor (Vichelocrego, Bertorella, Tranghallada, Non si? Teatro e Escola de Teatro da OMIX) aceptaron o reto de desenvolver integramente esta actividade dramática organizada polo IEM coa colaboración da concellería de Cultura do Concello de Gondomar.

Este venres, 10 de maio, TERTULIA do IEM co escritor, fotógrafo e profesor, Vítor Vaqueiro Foxo, co título "Fotografía, verdade, verosimilitude". O convidado será presentado polo director do IEM, Carlos Méixome. Como é costume o faladoiro terá lugar na sede do Instituto de Estudos Miñoranos, na Aula de Cultura "Ponte de Rosas" (Avda. da Feira, 10, baixo, Gondomar) ás 20:30h. Como é tradición, despois do acto aberto ao público en xeral haberá unha cea coa persoa convidada que terá lugar no Pazo da Escola de Mañufe Gondomar á que se poderá asistir facendo a correspondente reserva de praza no teléfono 986 360 575 ou no 680 644 490 ou ben no correo electrónico Este enderezo de correo-e está a ser protexido de programas autómatas de envío de correo non sedexado, precisas activar o JavaScript para velo , ata o xoves 9 de maio ás 22 horas.

O domingo 12 de maio, no Galiñeiro, terá lugar a III Romaría da Touba do Brión a partir das 10:30 horas. O monte non ten cancelas. Andaina até a Touba, con sorpresa e cancións. Despois, xantar na herba, cada quen o seu, que é de toda a xente. Con mantelo de cadros, he!

-As rutas etnográficas e arqueolóxicas da parroquia de Couso xa están dispoñibles en Internet.

O vindeiro sábado 4 de maio a partir das 17 horas, os alumnos do CEIP Chano Piñeiro (Gondomar), participarán dunha andaina polos xacementos arqueolóxicos localizados en terras da Comunidade de Montes de Couso. Coa guía dos especialistas do Instituto de Estudos Miñoranos, o arqueólogo Xosé Lois Vilar e mais o profesor Xilberte Manso, percorrerán unha ruta que permite visitar as pegadas da prehistoria miñorana, entre mámoas, petróglifos e castros diseminados ao longo do monte.